Ораза байрамынынъ биринджи кунюнден Шевваль айы башлана. Пейгъамберимиз (с.а.с.) Шевваль айына буюк эмиет берип, бу айда алты кунь ораза тута эди. Бир хадис-и шерифинде о, бойле буюргъан: «Ким Рамазан оразасыны тутса, сонъра Шевваль айындан онъа алты кунь къошса, бутюн йыл ораза туткъан киби олур» (Муслим). Башкъа бир хадисте Пейгъамберимиз (с.а.с.) бойле буюргъан: «Рамазан айында ораза тутмакъ он ай оразалы олмакъ кибидир. Шевваль айында ораза тутмакъ исе, эки ай ораза тутмакъ кибидир. Рамазаннен берабер Шевваль айыны оразанен кечирген кимсе бир йыл ораза туткъан кибидир» (Ибн Хузейме). Шевваль оразасынынъ эмиети акъкъында радиомызнынъ мусафири — Къырым Джумхуриети ве Акъяр шеэри Муфтисининъ муавини – Эмирасан Умеров тариф этти.